Britaniyalı yeniyetmələrin yarısı internetsiz həyat arzulayır

The Guardian qəzetinin istinad etdiyi sorğuya əsasən, 16-21 yaş arası britaniyalı gənclərin 46%-i gəncliklərini internetsiz keçirməyi üstün tutduğunu bildirib.

Sorğu nəticələrinə görə, respondentlərin təxminən 70%-i sosial şəbəkələrdə vaxt keçirdikdən sonra özlərini daha pis hiss etdiklərini deyib.

 Hər iki nəfərdən biri isə saat 22:00-dan sonra müəyyən tətbiq və saytlara girişi məhdudlaşdıran "rəqəmsal komendant saatı"nın olmasını təklif edib.

İştirakçıların 25%-i sosial mediada gündə dörd saatdan çox vaxt keçirdiklərini deyib, 42%-i isə valideynlərindən internetdə nə ilə məşğul olduqlarını gizlətdiklərini etiraf edib.

Eyni zamanda, 27%-i onlayn platformalarda özlərini başqa şəxs kimi göstərdiklərini, 40%-i isə anonim hesab istifadə etdiklərini bildirib.

Sorğu Birləşmiş Krallıq hökumətinin gecə saatlarında bəzi sosial şəbəkələrin məhdudlaşdırılması ilə bağlı müzakirələri fonunda keçirilib.

N.Təbrizli