Finlandiya Rusiyanın hərbi fəallığı fonunda müdafiəsini gücləndirir

Finlandiya Rusiyanın 1300 kilometrlik sərhəddə artan hərbi fəallığına cavab olaraq müdafiə infrastrukturunun genişləndirilməsi proqramını həyata keçirir. Bu barədə Finlandiya Müdafiə Qüvvələrinin Strateji İdarəsinin rəhbəri, general-mayor Sami Nurmi bildirib.

The New York Times və Wall Street Journal qəzetlərinin dərc etdiyi peyk görüntüləri Rusiyanın Finlandiya sərhədləri yaxınlığında hərbi infrastrukturu sistemli şəkildə gücləndirdiyini göstərir.

Kamyonka və Petrozavodsk bölgələrində çadır şəhərcikləri, zirehli texnika anbarları və pilotsuz aviasiya hissələri yerləşdirilib. Arktikadakı Severomorsk-2 helikopter bazasının bərpası da Finlandiyanın narahatlığına səbəb olub.

Helsinki hakimiyyəti müdafiə xərclərini ÜDM-in 3%-nə qədər artırmağı, ehtiyatda xidmət yaş həddini 65-ə çatdırmağı və 2031-ci ilə qədər 1 milyon nəfərlik səfərbərlik potensialı formalaşdırmağı planlaşdırır.

Apreldə Finlandiya piyada əleyhinə minaların qadağan olunması ilə bağlı Ottava Konvensiyasından çıxdığını elan edib.

Finlandiya prezidenti Tarja Halonenin keçmiş müşaviri Ayra Kalela haqqin.az-a bildirib ki, ölkə Rusiyanı potensial təhlükə kimi görür və bütün ssenarilərə hazırdır.

Onun sözlərinə görə, Finlandiyanın dondurulmuş Rusiya aktivlərindən maliyyələşdirilən Avropa Sülh Fondu çərçivəsində Ukraynaya 90 milyon dollar dəyərində ağır sursat göndərməsi Avropa təhlükəsizliyinin bir hissəsi kimi Ukraynanın müdafiəsinə verilən strateji dəstəyi əks etdirir.

N.Təbrizli