İsrail İrana yeni hava zərbələri dalğası endirir

 İsrail İrana qarşı hava zərbələrinin yeni mərhələsinə başlayıb, hücumlar əsasən Tehrandakı və ölkənin qərbində yerləşən hərbi obyektlərə yönəlib. Bu barədə İsrail Müdafiə Ordusunun (İDF) nümayəndələri məlumat verib.

İDF-nin briqada generalı Efi Defrin bildirib ki, çərşənbə günü gün ərzində üçüncü zərbə dalğası İranın qərb bölgələrini hədəfə alıb.

“İsrail Hərbi Hava Qüvvələrinin təyyarələri 'yer-yer' tipli raketlərin yerləşdiyi anbarlar və buraxılış qurğuları üzərində uçuşlar həyata keçirir”, –  o qeyd edib.

Bundan əvvəl İDF məlumat yayaraq bildirmişdi ki, İsrailə məxsus 60 döyüş təyyarəsi Tehranda yerləşən 20-dən çox hərbi hədəfi vurub.

İsrail Müdafiə Ordusunun mətbuat xidməti əlavə edib ki, hava zərbələri İranın paytaxtı Tehranda və digər bölgələrdəki obyektlərə qarşı davam edir.