Rusiya İrana zənginləşdirilmiş uranla bağlı əməkdaşlıq təklif edib

Rusiya İrana zənginləşdirilmiş uran sahəsində əməkdaşlıq təklif etməyə hazırdır. Bunu “Rosatom”un baş direktoru Aleksey Lixaçov bildirib.

 Onun sözlərinə görə, İranın nüvə sənayesinə aid əksər obyektlər son hücumlar zamanı zərər görməyib, çünki onlar yerin dərin qatlarında yerləşir.

“Biz İran tərəfi ilə zənginləşdirilmiş uran sahəsində razılaşdırılacaq çərçivədə əməkdaşlığa hazırıq”, –  Lixaçov Sankt-Peterburq Beynəlxalq İqtisadi Forumu çərçivəsində jurnalistlərə bildirib.

O əlavə edib ki, birbaşa zərbə olmasa da, elektrik enerjisinin kəsilməsi və ya heyətin səhvləri kimi dolayı amillər istənilən nüvə obyektinin təhlükəsizliyinə təsir edə bilər.

Bundan əvvəl Lixaçov məlumat vermişdi ki, “Rosatom” artıq İranda “Buşer” Atom Elektrik Stansiyasında ezamiyyətdə olan bəzi əməkdaşlarını evakuasiya edib və bu prosesə Azərbaycan və Ermənistanın dəstək göstərdiyini vurğulayıb.

O, eyni zamanda qadınlar, uşaqlar və tikinti işlərini başa vurmuş heyətin də evakuasiyasının nəzərdən keçirildiyini deyib.

Lixaçov qeyd edib ki, stansiyanın işlək birinci enerji blokuna hücum baş versə, nəticələr Çernobıl qəzası ilə müqayisə oluna bilər.

Rusiyanın Tehrandakı səfirliyi isə bildirib ki, “Buşer” AES normal rejimdə fəaliyyət göstərir və rusiyalı mütəxəssislər üçün təhlükə müşahidə olunmur.

Kremlin sözçüsü Dmitri Peskov isə təsdiqləyib ki, İsrail Rusiya mütəxəssislərinin təhlükəsizliyini təmin edəcəyinə dair öhdəlik verib.