6 oktyabr 2022-ci ildə Ermənistanın ərazi bütövlüyünü tanıdım - Paşinyan

Ermənistanın baş naziri Nikol Paşinyan 2022-ci il oktyabrın 6-da Ermənistanın ərazi bütövlüyünü rəsmi şəkildə tanıyıb. O, bu barədə İrəvanda keçirdiyi mətbuat konfransında danışıb.

Paşinyan qeyd edib ki, həmin tarixdə Azərbaycanın ərazi bütövlüyünü — o cümlədən Qarabağı da — tanıması barədə tez-tez xatırladılan arqumentlər kontekstdən çıxarılıb. Onun sözlərinə görə, bu qərar Ermənistanın öz ərazi bütövlüyünü tanıması ilə birbaşa bağlı idi.

“Əgər biz qonşularımızın ərazi bütövlüyünü tanımırıqsa, öz ərazi bütövlüyümüzü necə tanıya bilərik?” — Paşinyan bildirib.

Baş nazir əlavə edib ki, 2022-ci ilin sentyabr-oktyabr aylarında baş verən sərhəd gərginliyi zamanı Ermənistan Kollektiv Təhlükəsizlik Müqaviləsi Təşkilatına (KTMT) müraciət etsə də, aydın mövqe ilə qarşılaşmayıb. Onun sözlərinə görə, KTMT daxilində Ermənistanın sərhədlərinin konkret olaraq haradan keçdiyi ilə bağlı qeyri-müəyyənlik yaranıb.

“Bizə 'qırmızı xətt' vədi verilmişdi. Amma sentyabr hadisələrindən sonra KTMT-dən bu sərhədin haradan keçdiyini göstərmələrini istədik və bu günə qədər həmin 'qırmızı xətt' göstərilməyib,” — Paşinyan bildirib.

O qeyd edib ki, Ermənistanın öz ərazi bütövlüyünü tam şəkildə tanıması və müəyyən etməsi üçün qonşu dövlətlərin də sərhədlərinin tanınması vacibdir. Bu səbəbdən, o 2022-ci il oktyabrın 6-da Azərbaycanın ərazi bütövlüyünü də tanıdığını bildirib.

Paşinyan əlavə edib ki, bu qərarı daha əvvəl verməməsi "səhv qiymətləndirmə" və “ictimai-psixoloji səbəblər” ucbatından olub.

Baş nazir eyni zamanda Qarabağla bağlı keçmiş dövrlərdəki danışıqlarda öz mövqeyini Qarabağ nümayəndələri ilə razılaşdırdığını, bu yanaşmanın siyasi, hüquqi və mənəvi baxımdan doğru olduğunu bildirib.

Aytac