Hindistan yenidən Rusiya nefti alır

 Hindistanın neftayırma zavodları ABŞ-ın təzyiqindən sonra yaranan qısa fasilədən sonra Rusiyanın Urals markalı neftini almağa yenidən başlayıb və sentyabr-oktyabr  üçün bir neçə müqavilə imzalayıb. Bu barədəBloomberg çərşənbə axşamı mənbələrə istinadla xəbər verib.

Alıcılar arasında dövlətə məxsus Indian Oil Corp və Bharat Petroleum Corp da var. Bu məlumatı Reuters də təsdiqləyib.

ABŞ maliyyə naziri Skott Bessent bildirib ki, Vaşinqton Hindistanın Rusiya xam neftini kütləvi şəkildə idxal etməsini və ondan istehsal olunan məhsulları satmasını “qəbuledilməz” hesab edir. Onun sözlərinə görə, Rusiyanın Hindistanın neft idxalındakı payı Ukraynadakı müharibədən əvvəl 1%-dən az idisə, indi 42%-ə çatıb.

Avqustun əvvəlində ABŞ Hindistandan idxal olunan mallara tətbiq edilən gömrük rüsumlarını 25%-dən 50%-ə qaldırıb. Prezident Donald Tramp Hindistanı ucuz Rusiya neftindən “qazanc götürməkdə” və Moskvanın enerji və silahlarına həddindən artıq bağlılıqda ittiham edib.

Hindistanın Xarici İşlər Nazirliyi isə Qərbin tənqidini əsassız adlandırıb.