Türkiyə İsrailin hücumu ərəfəsində HƏMAS-ı xəbərdar edib

 Türkiyə Milli Kəşfiyyat Təşkilatı (MİT) Qətərdəki HƏMAS nümayəndə heyətini İsrailin planlaşdırılan hücumu barədə xəbərdar edib və bu, sentyabrın 9-da Dohada baş verən zərbədən sonra danışıqlarda iştirak edənlərin sağ qalmasına imkan verib. Bu barədə Türkiye qəzeti yazıb.

The Wall Street Journalın məlumatına görə, Türkiyə və Misir rəsmiləri bir neçə həftə əvvəl HƏMAS-ı təhlükəsizlik tədbirlərini gücləndirməyə çağırmışdılar. İsrail qırıcıları raketləri Qətərin hava məkanına daxil olmadan, Səudiyyə Ərəbistanı və BƏƏ üzərindən uçmadan buraxıb.

İsrail Dohada HƏMAS nümayəndələrini hədəfə almazdan əvvəl Tunis sahillərinə, Suriyanın Latakiya və Tartus bölgələrinə, həmçinin Livan və Qəzzaya zərbələr endirmişdi. HƏMAS altı nəfərin, o cümlədən Qəzzadakı lider Xəlil əl-Heyyanın oğlu Həmmamın öldüyünü bildirib.

İsrail tərəfi zərbənin nəticələri ilə bağlı şübhə etdiyini bildirib, HƏMAS isə danışıqlar heyətinin sağ olduğunu açıqlayıb.

İsrail hücumu sentyabrın 8-də Qüds girişində baş verən və altı nəfərin ölümü ilə nəticələnən terror aktından sonra həyata keçirilb.  Həmin hücuma görə məsuliyyəti HƏMAS öz üzərinə götürüb.

Əməliyyat “Od Zirvəsi” adlandırılıb. Qətər, Avropa İttifaqı, Böyük Britaniya və Kanada İsrailin hərəkətlərini pisləyib.

ABŞ prezidenti Donald Tramp bunu “kədərli hadisə” adlandırsa da, bunun “sülh üçün imkan” ola biləcəyini söyləyib.

Qətər baş naziri isə İsraili “dövlət terrorizmi”ndə günahlandırıb və cavab tədbirləri vəd edib.

N.Təbrizli