Tramp prezidentliyinin ikinci müddətin zamanı Si ilə ilk dəfə görüşüb

ABŞ prezidenti Donald Tramp və Çin Xalq Respublikasının Sədri Si Tszinpin Cənubi Koreyanın Busan şəhərində ikitərəfli görüş keçiriblər. Bu, Trampın ikinci prezidentlik dövründə liderlərin ilk fiziki görüşüdür. Danışıqlar 1 saat 40 dəqiqə davam edib.

Tramp görüşdən əvvəl jurnalistlərə bildirib ki, “çox uğurlu görüş” gözləyir. Si isə vurğulayıb ki, “ABŞ və Çin dost və tərəfdaş olmalıdır — bunu tarix də öyrədib, reallıq da tələb edir.”

Tramptan razılaşma əldə olunacaqmı sualına cavabı “Bəlkə də,” olub.

BBC-nin məlumatına görə, əsas müzakirə mövzuları gömrük tarifləri, süni intellekt çipləri və nadir torpaq elementləri, eləcə də TikTok platforması olub.

Tramp administrasiyası bəzi tarifləri azaltmaq əvəzində Çindən fentanil maddəsinin ixracı ilə mübarizədə əməkdaşlıq istəyib.

ABŞ Çin şirkətlərinə yüksək performanslı AI çiplərinin satışına etiraz edir — bu texnologiyaların hərbi məqsədlərlə istifadə olunacağından narahatdır. Çin isə nadir torpaq elementlərinin dünya üzrə əsas təchizatçısıdır.

ABŞ maliyyə naziri Skott Bessent bildirib ki, TikTok-un ABŞ bölməsinin satışı ilə bağlı razılaşma məhz bu sammitdə imzalana bilər, lakin dəqiq şərtlər hələ açıqlanmayıb.

ABŞ nümayəndə heyətinə dövlət katibi Marko Rubio, ticarət nümayəndəsi Ceymison Qrir, maliyyə naziri Skott Bessent, ticarət naziri Hovard Latnik, administrasiya rəhbəri Syuzi Vayls və Çindəki ABŞ səfiri Devid Perdü daxil olublar.

Çin tərəfdən xarici işlər naziri Van Yi, Dövlət Şurasının sədr müavini Xe Lifen, ticarət naziri Van Vəntao və İslahat və İnkişaf Komissiyasının sədri Çjen Şançze danışıqlarda iştirak ediblər.

N.Təbrizli