Paşinyan: Katolikos II Qaregin milli təhlükəsizlik üçün təhdiddir

Ermənistanın baş naziri Nikol Paşinyan çərşənbə günü bildirib ki, bütün ermənilərin katolikosu II Qaregin (Ktriç Nersisyan) milli təhlükəsizlik üçün təhdiddir və vəzifədən getməlidir.

Paşinyan jurnalistlərin suallarını cavablandırarkən Kilsə ruhanilərinə Milli Təhlükəsizlik Xidmətinin əməkdaşlarının səfərləri ilə bağlı mətbuatda yer alan xəbərləri şərh edib və liturgiyalar zamanı katolikosun adının çəkilməməsi ilə bağlı iddiaları təkzib edib.

Onun sözlərinə görə, hazırkı kilsə rəhbəri katalikosluq institutuna ziyan vurur.

“Ktriç Nersisyan getməlidir. Başqa variant yoxdur. Nə böyük leytenantlar, nə də yad xüsusi xidmət orqanlarının general-polkovnikləri ona kömək etməyəcək”, — baş nazir deyib.

Paşinyan kilsə ətrafında yaranan gərginliyi “sağlamlaşdırıcı proses” adlandırıb və demokratik ölkələrdə ictimai müzakirələrdən qaçmağın yolverilməz olduğunu bildirib.

Baş nazir əlavə edib ki, hökumətə tabe olan katolikos istəmir, lakin xarici strukturların təsiri altında ola biləcək kilsə rəhbəri də  qəbuledilməzdir. 

O, katolikosla bağlı kompromat iddialarını da rədd edərək, “Ktriç Nersisyan və onun qardaşı — gəzən kompromatlardır”, deyib və katalikosun qardaşını “sabiq KQB agenti” adlandırıb.

N.Təbrizli