İzmirdə 85 qanunsuz miqrant saxlanılıb

Türkiyənin İzmir vilayətinin sahillərində 85 qanunsuz miqrant saxlanılıb. Bu barədə ölkənin Sahil Mühafizəsi Komandanlığı məlumat yayıb.

Məlumata görə, mobil sahil müşahidə sistemi və pilotsuz uçuş aparatının köməyi ilə aşkarlanan iki qayıqda əməliyyat keçirilib. Qayıqlardan birində, aralarında 11 uşağın da olduğu 53 nəfər, digər qayıqda isə 32 nəfər saxlanılıb.

Hadisə ilə bağlı miqrant qaçaqmalçılığında şübhəli bilinən dörd nəfər saxlanılıb.

Sahil Mühafizəsi Komandanlığının bildirdiyinə görə, qanunsuz miqrantlar zəruri prosedurlar başa çatdıqdan sonra Vilayət Miqrasiya İdarəsinə təhvil verilib.