Nikol Paşinyana Hessen Sülh Mükafatı veriləcək

Ermənistanın baş naziri Nikol Paşinyan Cənubi Qafqazda sülhün bərqərar olması istiqamətində səylərinə görə Hessen Sülh Mükafatına layiq görülüb. Bu barədə ölkənin Almaniyadakı səfirliyi məlumat yayıb. 

Mükafat Paşinyana sentyabrın 18-də Almaniyanın Visbaden şəhərində Hessen Federal Ştat Parlamentində keçiriləcək mərasimdə təqdim olunacaq.

25 min avro məbləğində olan mükafat Paşinyanın demokratik islahatlar, Ermənistanın Avropa İttifaqına yaxınlaşması və Azərbaycanla münasibətlərin normallaşdırılması istiqamətində fəaliyyətinə görə veriləcək.

Mükafatın təşkilatçıları Paşinyanın Azərbaycanla sülh prosesində əldə olunan irəliləyişdə rolunu xüsusi qeyd ediblər.

Hessen Sülh Mükafatı 1994-cü ildən Albert Osvald Fondu tərəfindən təqdim olunur. Mükafat müharibə və zorakı münaqişələrin qarşısının alınması, sülhün təşviqi və xalqlar arasında qarşılıqlı anlaşmaya töhfələrə görə verilir.

Gülnar Nazimqızı