ABŞ BƏƏ-dəki vətəndaşlarını Yaxın Şərqdə artan hücum təhlükəsi barədə xəbərdar edib

ABŞ-nin Birləşmiş Ərəb Əmirliklərindəki (BƏƏ) səfirliyi Yaxın Şərqdə artan silahlı hücum təhlükəsi ilə əlaqədar regiondakı ABŞ vətəndaşlarını yüksək sayıqlıq nümayiş etdirməyə çağırıb.

Bu barədə diplomatik missiyanın yaydığı bəyanatda bildirilib.

Səfirlik təhlükəni Yəməndəki husilərin fəaliyyəti, eləcə də İranın regionda ABŞ dövlət qulluqçularına hücum cəhdləri ilə əlaqələndirib.

Diplomatik missiya uçuşların mümkün ləğv edilməsi, hava məkanının bağlanması və nəqliyyat əlaqələrində fasilələrin yaranması barədə xəbərdarlıq edib.

ABŞ vətəndaşlarına ehtiyat səfər planları hazırlamaq, uçuşların statusunu aviaşirkətlərdən dəqiqləşdirmək, insanların kütləvi toplaşdığı yerlərdən uzaq durmaq və yerli hakimiyyət orqanlarının göstərişlərinə əməl etmək tövsiyə olunub.