Özbəkistan prezidenti dəyişir

Bu ölkədə prezident seçkiləri kampaniyasına başlanılıb

Özbəkistanda prezident seçkiləri kampaniyasına rəsmən start verilib.

ANS PRESS respublikanın Mərkəzi Seçki Komissiyasına istinadla verdiyi xəbərə görə, səsvermə 2015-ci il martın 29-na təyin edilib. Özbəkistan Konstitusiyasına uyğun olaraq, prezident beş illik müddətə seçilir. Bu vəzifəyə respublika vətəndaşı olan, 10 il ölkə ərazisində yaşayan, yaşı 30-dan çox olan şəxslər namizədlyini verə bilərlər.

Hazırda Özbəkistanın qüvvədə olan prezidenti 76 yaşlı İslam Kərimov 25 ildir bu ali vəzifəni daşıyır. O əvvəllər Özbəkistan SSR Kommunist Partiyası Mərkəzi Komitəsinin birinci katibi olub.

Ölkə Konstitusiyasına görə, bir şəxs iki dəfədən artıq prezident postunu ardıcıl tuta bilməz. Buna baxmayaraq, İ.Kərimov 2007-ci ildə üçüncü müddətə perezident olub. O dövrdə Konstitusiyaya edilən düzəlişlərə əsasən prezidentlik müddəti 5 ildən 7 ilədək artırılsa da, sonra yenidən 5 ilə endirilib. Bu, isə İ.Kərimova növbəti dəfə prezidentliyə namizəd olmağa icazə verir.