Keçmiş nazir prezident seçildi

Yunanıstanın iqtidar partiyası Radikal Sol Koalisiya (SYRİZA) və Müstəqil Yunanlar (ANEL) tərəfindən namizəd göstərilən Prokopis Pavlopulos ölkənin yeni prezidenti seçilib.

ANN.Az xarici ölkə mediasına istinadən xəbər verir ki, keçmiş daxili işlər naziri və konstitusiya hüququ üzrə professor 64 yaşlı Prokopis Pavlopulos seçkidə qalib çıxıb. Ölkənin parlamentində keçirilən səsvermədə prezidentlik postuna 2 namizəd olub. İqtidarın namizədi Prokopis Pavlopulos müxalifət partiyaları - Potami və PASOK-un namizədi, konstitusiya hüququ üzrə professor Nikos Alivizatosla yarışıb.

Səsvermə zaman 300 üzvü olan parlamentin 295 nəfəri prosesdə iştirak edib və Prokopis Pavlopulos 233 səs çoxluğu ilə qalib elan olunub.

Prokopis Pavlopulos 1950-ci ildə Kalamatada dünyaya gəlib. Hüquq təhsili alan Pavlopulos Fransada bu sahə üzrə doktorluq müdafiə edib. Afina Universitetində müəllim işləyib. Öz ixtisası üzrə çox sayda kitab və məqalə müəllifidir.

Bundan əlavə, Prokopis Pavlopulos 1996-cı ildən indiyə kimi müxtəlif vəzifələrdə çalışıb. O, 2007-2009-cu illərdə ölkənin daxili işlər naziri postunda olub.

Prokopis Pavlopulos evlidir, 1 oğlan, 2 qız atasıdır.

ANN.Az