Öncə çıxış edən kafedra müdiri Sevda Zamanova qonaqları universitetdə görməkdən şad olduğunu bildirdi, dəvəti qəbul edib seminarda iştirak etdiklərinə görə dərin təşəkkürünü bildirdi. Qonaqları tələbələrə təqdim edən Sevda Zamanova onların fövqəladə hallar zamanı mənəvi psixoloji durum haqqında məlumat verəcəklərini söylədi. O, kafedra tərəfindən aktual məsələlərə toxunan müxtəlif səpkili tədbirlərin təşkil edildiyini dedi, bunun da öz növbəsində tələbələr üçün yararlı olacağını qeyd etdi. Fövqəladə hadisələr zamanı bütün insanların qəzaların nəticələrinin aradan qaldırılmasına cəlb olunmasının mütləqliyindən bəhs edən Sevda Zamanova bu məqsədlə universitetdə Mülki Müdafiənin tədris olunduğunu diqqətə çatdırdı.

 

ADU-nun Regionşünaslıq və Beynəlxalq Münasibətlər fakültəsinin tələbərinin iştirak etdiyi seminarda çıxış edən "Həyat” klinikasının psixoloqu Ramin Nəcəfli fövqəladə hallar zamanı yaranan eksterimal situasiyalar, psixoloji pozğunluqlar, stress, panik atak və depressiyaların əlamətləri, onlardan xilas olma yolları, ilk yardım texnikası barədə danışdı. Qəzaların təkcə müharibələrdə deyil, gündəlik həyatda da baş verdiyini diqqətə çatdıran Ramin Nəcəfli buna görə də, hər bir insanın özünü müdafiə etmək qabiliyyətinə malik olmasının vacibliyini qeyd etdi.

 

Daha sonra çıxış edən Azərbaycan Kardiologiya Cəmiyyətinin idarə heyətinin üzvü, tibb üzrə fəlsəfə doktoru, kardioloq Tofiq Sadıqov qəfləti ürək ölümü, onun yaranma səbəbləri, qarşısının alınması istiqamətində görüləcək profilaktik tədbirlər haqqında ümümi məlumat verdi. O, qəfləti ürək ölümü zamanı ilkin yardım göstərilməzsə kliniki ölümün bioloji ölümə keçdiyini söylədi, ilk yardım prosesinin  düzgün formada aparılması ardıcıllığının vacibliyini vurğuladı.

 

Sonda mövzu ilə bağlı məlumatları əks etdirən maarifləndirici sənədli film nümayiş olundu.