E.Brokun "əks təqdirdə Azərbaycanı itirə bilərsiniz” şəklində xəbərdarlıq etdiyini də xatırladan müəllif Azərbaycan parlamentinin məsələ ilə əlaqədar növbədənkənar iclas keçirdiyini və qəbul edilmiş qətnamənin Azərbaycana qarşı qərəzli münasibətin olması ilə əlaqələndirdiyini vurğulayıb. 

Məqalədə xüsusilə qeyd edilib ki, Avropa Parlamentində qəbul edilmiş qətnamə rəsmi Bakının Avropa ilə əlaqəli iri enerji layihələrin həyata keçirilməsində marağını azalda bilər. 

Adıçəkilən məqalədə qaldırılan məsələlərlə bağlı ANN.Az xəbər portalının əməkdaşı  Milli Məclisinin üzvü, YAP-ın Siyasi Şurasının üzvü Aydın Mirzəzadənin və Neft Araşdırmaları Mərkəzinin rəhbəri İlham Şabanın münasibətini öyrənib.

 

 

 

Deputat Aydın Mirzəzadə bu qənaətdədir ki, artıq Avropada  da Azərbaycana qarşı qəbul edilmiş qətnamədən narahatdırlar və müəyyən iqtisadi bazarların Azərbaycanla əlaqələrinin azalacağı təhlükəsini hiss edirlər:  "Bir ay bundan öncə qəbul edilən qətnamə müəyyən qüvvələrin  Azərbaycana qarşı səlib yürüşü idi. Avropa Parlamenti Azərbaycana qarşı qətnamə qəbul etdi və Azərbaycan da buna qarşı öz layiqli cavabını verdi. Düzdür, hazırda Avropa ilə heç bir əlaqələrimiz kəsilməyib və bu əlaqələri kəsmək fikrində də deyilik. Bu gün Azərbaycanın Ermənistandan başqa heç bir düşməni yoxdur. Avropa Parlamentinin qətnamə qəbul etməsi düşmənçilik münasibətlərin yaranması demək deyil”.    

Azərbaycanın enerji layihələri üzrə planlarını, öhdəliklərini yerinə yetirdiyini, bundan sonar da olduğu kimi davam edəcəyini vurğulayan A.Mirzəzadə  Avropa Parlamentinin Xarici Əlaqələr Komitəsinin rəhbəri Elmar Brokun bu cür çıxışının  heç nəyi dəyişməyəcəyini əlavə edib: "Yəni həmişə olduğu kimi Azərbaycan Avropa ilə əlaqələrini davam etdirəcək. Sadəcə, Azərbaycanla Avropa Parlamenti arasında münasibətlər əvvəlki səviyyədə deyil. Bu qətnamədən sonra tək Avropa Parlamentinin Xarici Əlaqələr Komitəsinin rəhbəri Elmar Brokun çıxışı deyil, digər Avropa rəsmilərinin də Azərbaycana qarşı münasibətləri müsbət mənada dəyişib”.

 

 

Mövzu ilə bağlı ANN.Az-a fikirlərini açıqlayan İlham Şaban bu kimi bəyanatların heç bir siyasi əsası olmadığını deyib: "Hansısa bir deputatın iclasda belə fikir səsləndirməsinin, yaxud "Avropa Azərbaycanı itirə bilər” kimi cümlələr işlətməsinin iqtisadi baxımdan hansı əsası ola bilər ki? Praktik baxımdan belə çıxır ki, artıq Azərbaycan öz qazını Avropaya verməyəcək? Bu vaxta qədər qurduğu iqtisadi əlaqələrini dayandıracaq? Əlbəttə, yox! Azərbaycan özü maraqlıdır ki, iqtisadi baxımdan Avropa ilə əlaqələrini genişləndirsin. Avropa-Azərbaycan münasibətlərinin mənfiyə doğru getməsi Azərbaycana daha çox ziyan gətirə bilər, nəinki Avropaya”.