Ukraynanın Sumı vilayətinin dövlət administrasiyasının rəhbərliyi azərbaycanlı investorlarla Romensk rayonunda ümumi dəyəri 22 mln. dollar və illik gücü 220-230 min ton həcmində olan soya emalı zavodunun tikintisi ilə bağlı razılığa gəliblər.

 

"APA-Economics”in Ukrayna KİV-lərinə istinadən verdiyi məlumata görə, bu barədə administrasiyanın rəhbəri Nikolay Kloçko bildirib.

 

Tikintisi planlaşdırılan soya zavodunun emalı üzrə ilkin mərhələdə 200-dən çox yeni iş yerinin açılması gözlənilir.

 

"Bundan başqa, 2016-cı ildə vilayətin Belopolsk vilayətindəki keçmiş Veliko-Jovtnev şəkər zavodunun bazasında ilk növbədə alternativ yanacaq növləri, xüsusilə də bioetanın istehsalı ilə məşğul olacaq müəssisənin açılışı planlaşdırılıb”, - deyə o bildirib.

 

N. Kloçko vurğulayıb ki, bu investisiya layihələri barədə əminliklə danışmaq mümkündür: "Çünki, bu layihələrin altında konkret razılıq və fəaliyyət durur”.