Quş əti və yumurta idxalına görə rüsumların qüvvədə olma müddəti uzadıldı

Yerli istehsalçılar tərəfindən edilən çoxsaylı müraciətləri nəzərə alaraq Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK), Nazirlər Kabinetinin 2016-cı il 23 sentyabr tarixli 367 nömrəli qərarının qüvvədə olma müddətinin uzadılması ilə Nazirlər Kabinetinə və bir sıra digər dövlət orqanlarına müraciət edib.

Bu barədə ASK-dan Modern.az-a verilən məlumatda bildirilib.

Qeyd edilib ki, 367 nömrəli qərara əsasən ölkədə sahibkarlığın inkişaf etdirilməsi və biznes mühitinin daha da yaxşılaşdırılması, yerli sahibkarların fəaliyyətinin genişləndirilməsi, yerli istehsalın qorunması məqsədi ilə Azərbaycana gətirilən bəzi mal mövqeləri üzrə gömrük idxal rüsumları artırılıb. 

Müraciətdə ASK yuxarıda qeyd edilən qərarın son iki ildə icrası dövründə toyuq və ərzaqlıq yumurta istehsalının əhəmiyyətli dərəcədə artdığını,  idxal olunan məhsullara tətbiq edilən spesifik gömrük rüsumu sayəsində yerli istehsalın inkişaf etdiyini qeyd edib. Qərarın qüvvədə olma müddətinin uzadılmasının yerli istehsalın daha da rəqabət qabiliyyətli səviyyəyə yüksəlməsinə təkan verəcəyi bildirib.

ASK-nın da təklifləri də nəzərə alınaraq, bir sıra məhsulların, o cümlədən quş əti və ərzaqlıq yumurtanın idxalına tətbiq olunan spesifik rüsumların qüvvədə olma müddəti 2019-cu ilin 15 dekabr tarixinədək uzadılıb.