Gözdən əlillər nazirliyin qarşısında etiraz aksiyası keçirib - Açıqlama

Bu gün bir qrup gözdən əlil Əmək və Əhalinin Sosial Müdafiəsi Nazirliyinin qarşısında toplaşaraq mənzil təminatı ilə bağlı etiraz aksiyası keçiriblər.

Sosial Xidmətlər Agentliyinin mətbuat katibi Murad Həşimov məsələ ilə bağlı açıqlama yayıb.

 

O bildirib ki, aidiyyəti rəhbər şəxslər onları qarşılayıb qəbula dəvət etsələr də, həmin şəxslər bundan imtina ediblər: "Hər birinin müraciəti araşdırılıb. Müəyyən olunub ki, gələnlərin bir çoxunun mənzil təminatı həyata keçirilib. Mənzillə təmin olunmaq hüququ yaranmayan şəxslərə isə aidiyyəti üzrə müraciət etmələri tövsiyə olunub. Həmçinin mənzil növbəsində olanlara isə növbəti dəfə Abşeron rayonunda yeni yaşayış kompleksindən mənzillər təklif olunsa da, onlar Bakı şəhərinin digər rayonlarından mənzil tələbi irəli sürüblər. Onlara bildirilib ki, bu məsələyə də yalnız növbəlilik qaydasında baxılacaq.

Müraciət edənlər sırasında I qrup gözdən əlilliyi olan Nuranə Cabbarlının anası Aygün Cabbarova aqressiv şəkildə, etik normalardan kənar davranışları ilə seçilib. O, əməkdaşları təhqir edib, asayişi pozmaq üçün bir neçə dəfə cəhdlər edib. Məlumat üçün bildirək ki, Aygün Cabbarovanın ailəsinə nazirlik xətti ilə kifayət qədər dəstək göstərilib. Özü qulluğa görə aylıq olaraq təqaüd alır. Həyat yoldaşı Cəbi Cabbarov Qarabağ əlili kimi 657 manat, Qızı Nuranə aylıq olaraq 458 manat sosial ödənişlərlə (pensiya və təqaüd) təmin edilib.