Azərbaycanda nə qədər uşaq sosial müavinət alır - RƏSMİ

Azərbaycanda 611 min uşaq sosial müavinət alır. Bu barədə Əmək və Əhalinin Sosial Müdafiə Nazirliyinin yaydığı hesabatda bildirilib. 

Bildirilib ki, hazırda 18 yaşına çatmayan 50 min əliliyi olan uşaq, Ailə başçısını itirmiş 166 min uşaq, aztəminatlı (ünvanlı sosial yardım alan) ailələrdəki uşaqlar - 160 min uşaq, İşləyən valideynlər - 3 yaşadək uşaqlara qulluğa görə - 35 min uşaq, uşağın anadan olmasına görə birdəfəlik müavinət - 120 min uşaq, Şəhid ailələrinin, müharibə ilə əlaqədar əlilliyi olanların, 5-dən çox uşağı olan qadınların, müddətli hərbi xidmət qulluqçularının uşaqları və b. - 30 min uşaq, eləcə də, 18 yaşadək əlilliyi olan şəxslərə qulluq edənlər və valideyn himayəsindən məhrum uşaqların qəyyumları - 50 min şəxsə sosial ödənişlər ödənilir. 

Ümumilikdə bu ödənişlər üçün 650 milyon manat vəsait ayrılır. 

Noyabrın 17-də Milli Məclisin plenar iclasında deputat Vahid Əhmədov Əmək və Əhalinin Sosial  Müdafiə naziri Sahil Babyeva müraciət edərək bildirmişdi ki, ölkədə sosial müavinət edən uşaqların statistikası ilə bağlı açıqlama versin. Vahid Əhmədovla yanaşı bir neçə deputat ölkədə uşaq pulunun yenidən bərpa olunmasını təklif edib. 

Deputat Zahid Oruc təklif edib ki, uşaq pulunun yenidən bərpa olunması Qarabağa Qayıdış proqramı çərçivəsində başlamaq yaxşı olar.

Millət vəkili Fəzail Ağamalı isə təklif edib ki, sosial müavinətə ödənilən pul uşaq pulu adına transfer olsun.

Əmək və Əhalinin Sosial Müdafiə Naziri Sahil Babayev Parlamentin 2023-cü il büdcə müzakirəsi zamanı komitə iclasınlarının birində bildirib ki, hazırda Azərbaycanda 600 mindən çox uşağa nazirlik tərəfindən sosial müavinətlər ödənilir. 

Gülnar Nazimqızı 

www.anews.az