“Bakı Marafonu 2025”ə qeydiyyat davam edir - Video

Mayın 4-də Heydər Əliyev Fondunun təşəbbüsü ilə təşkil ediləcək Bakı marafonuna qeydiyyat davam edir.

İndiyədək 20 minə yaxın şəxs marafonda qeydiyyatdan keçib. Onların arasında tanınmış siyasi-ictimai, incəsənət xadimləri, ziyalılar var, eləcə də müxtəlif ölkə vətəndaşları var.

Martın 4-dən başlayan qeydiyyat aprelin 25-dək davam edəcək. 18 yaşdan yuxarı şəxslər bu müddətdə Bakı şəhərinin ticarət mərkəzlərindəki (“28 Mall”, “Gənclik Mall”, “Dəniz Mall”) qeydiyyat məntəqələrinə və ya “Bakı Marafonu 2025”in saytına - www.marathon.az müraciət edə bilərlər.

“Bakı Marafonu 2025”-in Könüllü Proqramına qeydiyyat isə artıq başa çatıb. “Regional İnkişaf” İctimai Birliyinin (RİİB) tərəfdaşlığı ilə həyata keçirilən bu proqram çərçivəsində 2 mindən çox könüllü qeydiyyatdan keçib. Seçilmiş namizədlər hazırda müsahibədən keçirlər. Müsahibədən uğurla keçənlər üçün isə marafona hazırlıq məqsədilə görüşlər və xüsusi təlimlər təşkil ediləcək.

Hazırda marafona hazırlıq məqsədi ilə Təşkilat Komitəsi tərəfindən qeydiyyatdan keçən iştirakçılar üçün həftədə iki dəfə  məşqlər də təşkil edilir.

2016-cı ildən “Küləyə qalib gəl” şüarı ilə təşkil edilən Bakı Marafonu idmanın inkişafına dəstək göstərmək, sağlam həyat tərzini təbliğ etmək məqsədi daşıyır.

Start və finiş nöqtələri Dövlət Bayrağı Meydanı olan marafonun marşrutu Dənizkənarı Bulvar, o cümlədən paytaxtın mərkəzi küçə və prospektlərini, ümumilikdə 21 km-lik məsafəni əhatə edəcək:

“Bakı Marafonu 2025”in mükafatlandırması iki kateqoriyada olacaq. Marafonun kişi və qadın iştirakçıları qaçış zolağında ilk 3 yer uğrunda mübarizə aparacaqlar. Kişi və qadın kateqoriyalarının hər birində 1-ci yerin qalibi 3 000 AZN, 2-ci yerin qalibi 2 000 AZN, 3-cü yerin qalibi isə 1 000 AZN məbləğində mükafat və hədiyyələrlə, eləcə də medal və sertifikatlarla təltif olunacaq.

Finiş xəttini keçən ilk 2000 iştirakçı isə “Bakı Marafonu 2025”in xüsusi medalları ilə mükafatlandırılacaq. Bununla yanaşı, bütün marafon iştirakçılarına və yarışın təşkilində dəstək göstərən könüllülərə sertifikatlar təqdim olunacaq.

Marafon iştirakçıları, şəhər sakinləri və qonaqlar üçün Dövlət Bayrağı Meydanında ənənəvi olaraq əyləncə zonası da yaradılacaq. Burada müxtəlif əyləncə proqramları, yarışlar, idman tədbirləri keçiriləcək.

Əyləncə zonaları marafonun marşrutu boyu da təşkil ediləcək.