Bəzi dərmanların qəbulu günü kofe içmək olmaz - Həkim məsləhəti

Rusiyalı terapevt Nazifat Urtenova bəzi dərmanların qəhvə ilə birlikdə qəbul edilməsinin sağlamlığa zərər verə biləcəyini bildirib. O, “Gazeta.ru”ya açıqlamasında qəhvənin dərmanların təsirini zəiflədə və ya onların yan təsirlərini artıra biləcəyini deyib.

Məsələn, ftorxinolon qrupuna aid antibiotiklər (siprofloksasin, norfloksasin) qəhvədəki kofeinin bədəndən çıxarılmasını ləngidir və bu, yuxusuzluq, narahatlıq və əsmə ilə nəticələnə bilər.

Tetrasiklin antibiotiklərinin qəbulu zamanı da qəhvə dərmanın sorulmasını zəiflədir.

Həkim qeyd edib ki, hamiləlikdən qorunma dərmanlarındakı estrogenlər kofeinin parçalanmasını ləngidir, bu isə kofeinin orqanizmdə yığılmasına və baş ağrısı, yuxusuzluq yaratmasına səbəb ola bilər.

Urtenova əlavə edib ki, parasetamolla birlikdə qəhvə qara ciyərə yükü artırır, ibuprofen və aspirinlə isə mədədə qıcıqlanma yarada bilər.

Qəhvə bəzi antidepresanlarla, xüsusilə MAO inhibitorları (moklobemid, selegilin) və trisiklik antidepresantlarla (məsələn, amitriptilin) birlikdə qəbul edildikdə təzyiqin kəskin artmasına və narahatlıq riskinin yüksəlməsinə səbəb ola bilər.

Qəhvə həm də bağırsaqlarda dəmirin sorulmasına mane olur, şəkər səviyyəsini artıra və metformin kimi diabet dərmanlarının təsirini azalda bilər. Üstəlik, bəzi ürək dərmanlarının, xüsusən beta-blokatorların və ritm pozğunluğuna qarşı dərmanların effektivliyini zəiflədə bilər.

Həkim, həmçinin qəhvənin karbamazepin və valpro turşusu kimi epilepsiya əleyhinə dərmanların təsirini azalda biləcəyini bildirib.

N.Təbrizli