Rezidenturaya qəbul imtahanının ikinci mərhələsi 10 avqustda keçiriləcək

Rezidenturaya qəbul imtahanının ikinci mərhələsi 10 avqust 2025-ci il tarixində Bakı və Naxçıvan şəhərlərində keçiriləcək. Bu barədə Dövlət İmtahan Mərkəzi (DİM) məlumat yayıb.

İmtahan saat 10:00-da başlanacaq və 2 saat 30 dəqiqə davam edəcək. İştirakçılar üçün buraxılış rejimi saat 09:45-də başa çatır. Gecikənlər imtahan binasına buraxılmayacaq.

İmtahan Bakı şəhərində 4, Naxçıvanda isə 1 binada təşkil olunacaq. Ümumilikdə 905 namizədin iştirak edəcəyi gözlənilir. Onlardan 336-sı oğlan, 569-u isə qızdır; 739 nəfər Azərbaycan bölməsinin, 169 nəfər rus bölməsinin məzunudur. 2 nəfər isə xarici vətəndaşdır.

İmtahanın idarə olunmasına 5 ümumi imtahan rəhbəri, 11 imtahan rəhbəri, 81 zal nəzarətçisi və 12 mühafizə əməkdaşı cəlb olunub.

DİM-in məlumatına görə, iştirakçılardan 674 nəfər əvvəlki illərin nəticələri, 231 nəfər isə bu ilki imtahan nəticəsinə əsasən ikinci mərhələyə buraxılıb.

Namizədlər şəxsiyyət vəsiqəsi və buraxılış vərəqəsi ilə gəlməlidirlər. Uyğunsuzluq və ya sənədin olmaması halında iştirak imkanı verilməyəcək.