Universitetlərdə rus dili bölməsinə qəbul dayandırılmayıb - Rəsmi

Bir sıra ali təhsil müəssisələrinin rus dili bölməsində ixtisasların ləğv olunması ilə bağlı yayılan məlumatlar həqiqəti əks etdirmir. Bu barədə Dövlət İmtahan Mərkəzi (DİM) anews.az-ın sorğusuna cavab olaraq bildirilib. 

DİM-in açıqlamasında qeyd olunub ki, sözügedən yanlışlıq “Abituriyent” jurnalının 2025-ci il üçün 4-cü buraxılışında rus dili bölməsi üzrə ixtisasların yer almaması ilə bağlı yayılan xəbərlərdən qaynaqlanıb. Mərkəz bildirib ki, jurnalın rus dilində olan versiyası ilə Azərbaycan dilində olan versiyası fərqli qruplar üçün nəzərdə tutulub.

“Rus bölməsi ilə bağlı məlumatlar jurnalın rus dilində dərc olunan variantında əks olunub. Jurnalın yalnız Azərbaycan dilində çıxan versiyasına əsaslanaraq yanlış nəticə çıxarılıb,” – DİM-in açıqlamasında bildirilib.

Sİyahıda adı çəkilən bir neçə universitetdə bu xəbəri təkzib etdi. Bildiridilər ki, bu həqiqətə uyğun olmayan informasiyadır. 

Bu gün Modern.az saytı məlumat paylaşaraq qeyd edib ki, “Abituriyent” jurnalının 2025-ci ilin 4-cü nömrəsindəki bir sıra ali təhsil müəssisələrinin ixtisas siyahısında rus dili bölməsinə müsabiqə ləğv olunub. 

Aytac Zeynalova