Alimlərə “Cambridge Press” jurnallarında ödənişsiz məqalə dərc etmək imkanı verilib

Elm və Təhsil Nazirliyi ilə Kembric Universitetinin nəşriyyatı arasında əldə olunan razılaşmaya əsasən, Azərbaycanda fəaliyyət göstərən müəlliflər növbəti 3 il ərzində “Cambridge Press” jurnallarında limitsiz sayda ödənişsiz məqalə dərc edə biləcəklər.

Bu razılaşma nəticəsində azərbaycanlı alimlər Web of Science və Scopus kimi beynəlxalq elmi bazalarda indekslənən 422 açıq əlyetərli (open access) jurnalda minlərlə manat dəyərində olan nəşr xərclərindən azad olunurlar.

Elm və Ali Təhsil üzrə Dövlət Agentliyinin verdiyi məlumata görə, bu addım yerli alimlərin beynəlxalq elmi aləmdə görünürlüğünü artırmağa və elmi tədqiqatların daha geniş yayılmasına xidmət edir.

Bundan əlavə, ölkənin 140 elmi və ali təhsil müəssisəsi “Cambridge Press” jurnallarını müddətsiz və ödənişsiz oxumaq imkanı əldə edib.

Alimlər xidmətə Cambridge Core platforması (cambridge.org/core) vasitəsilə daxil ola bilərlər.

Nazir Emin Əmrullayev bir müddət  öncə ölkədə fəaliyyət göstərən alimlərlə görüşüb.

Əmrullayev alimlərin təkliflərini və hazırda mövcud olan problemlərini dinləyib. 

2025-ci il ölkədə 300-dək alim mükafatlandırılacağı gözlənilir. 

Elm və Ali Təhsil üzrə Dövlət Agentliyi bundan əvvəl açıqlayıb ki, elmi göstəriciləri yüksək olan bir sıra tədqiqatçılara iyuldan başlayaraq hər ay min manatadək vəsait ödənilir. 

Bundan əvvəl elm və təhsil naziri Emin Əmrullayev çıxışlarında bildirib ki, hazırda son 3-5 ildə elmi nailiyyətləri yüksək olan alimlərin fəaliyyətləri araşdırılır.
 
Hazırda Elmi Tədqiqat İnstitutlarında 8 minə yaxın şəxs çalışır, onların 5 minə yaxını sırf elmi araşdırmalarla məşğuldur. 
 
Nazir həmçinin daha öncəki çıxışları zamanı söyləyib ki, son 5 ildə yazı yazmayan alimə alim kimi yanaşmaq doğru deyil.

Bundan əvvəl nazir Emin Əmrullayev onu da bildirib ki, hazırda ölkədə olan şərtlərə görə xaricdə fəaliyyət göstərən alimlər Azərbaycana gəlməkdən imtina edir. 

Gülnar Nazimqızı