Azərbaycan və Qazaxıstan prezidentləri Astanada strateji tərəfdaşlığı müzakirə ediblər

Azərbaycan Prezidenti İlham Əliyev oktyabrın 21-də Astanada Qazaxıstan Prezidenti Kasım-Jomart Tokayev ilə təkbətək görüş keçirib. Tərəflər siyasi və iqtisadi sahələrdə strateji əməkdaşlığın dərinləşdirilməsini, habelə regional sabitlik və tranzit layihələri üzrə əməkdaşlığı müzakirə ediblər.

Tokayev görüş zamanı Azərbaycanın beynəlxalq nüfuzunun artdığını vurğulayaraq bildirib ki, iki ölkə arasında münasibətlər təkcə dostluq deyil, eyni zamanda qardaşlıq xarakteri daşıyır. O, Azərbaycanı “regional güc” adlandırıb və Prezident Əliyevin liderliyini yüksək qiymətləndirib.

“Azərbaycan Sizin güclü liderliyinizlə öz mövqelərini xeyli möhkəmləndirib və beynəlxalq arenada nüfuzunu artırıb”, –  Tokayev bildirib.

Prezident Əliyev çıxışında Qazaxıstanın iqtisadi inkişafını və ictimai-siyasi sabitliyini qeyd edərək ölkənin həyata keçirdiyi islahatlara dəstək ifadə edib.

Azərbaycan və Qazaxıstan arasında 2022-ci ildən etibarən strateji müttəfiqlik haqqında Bəyannamə qüvvədədir. İki ölkə arasında 2024-cü ilin ilk 8 ayında ticarət dövriyyəsi 550 milyon ABŞ dollarını keçib, bu da ötən ilin eyni dövrü ilə müqayisədə 30%-lik artım deməkdir.

Tərəflər enerji, nəqliyyat və logistika sahələrində əməkdaşlığın genişləndirilməsi, o cümlədən Transxəzər Beynəlxalq Nəqliyyat Marşrutu (Orta Dəhliz) üzrə birgə layihələrin sürətləndirilməsi istiqamətində fəaliyyət göstərirlər.