9 vəzifəli nöqsanlara görə vəzifəsindən azad edilib - Səfərbərlik Xidmətinin rəsmisi

Səfərbərlik və Hərbi Xidmətə Çağırış üzrə Dövlət Xidmətində bu il işində yol verdiyi nöqsanlara görə 9 əməkdaş vəzifədən azad edilərək ehtiyata buraxılıb. Bu barədə qurumun Təşkilati Nəzarət Baş İdarəsinin rəisi, polkovnik Əziz Hidayev QHT nümayəndələri ilə görüşündə bildirib.

Onun sözlərinə görə, xidmətdə qeyri-qanuni hərəkətlərə dair 2023-cü ildə 78, 2024-cü ildə 249, 2025-ci ilin indiki dövrünə qədər isə 158 fakt müəyyən edilib. Hidayev deyib ki, həmin əməkdaşlar barəsində müxtəlif inzibati tənbeh tədbirləri tətbiq olunub.

Rəsminin açıqlamasına görə, 2023-cü ildə 22 nəfər üzrə 15, 2024-cü ildə 95 nəfər üzrə 51, cari ilin 11 ayında isə 93 nəfər üzrə 44 material araşdırılması üçün prokurorluğa göndərilib.