FHN: Bir həftədə 213 yanğına çıxış edilib, 8 nəfər ölüb

Azərbaycanın Fövqəladə Hallar Nazirliyi (FHN) ötən həftə ərzində ölkə üzrə 213 yanğın hadisəsinə, 27 köməksiz vəziyyətdə qalma halına, 5 yol-nəqliyyat qəzasına və 1 partlayış faktına görə qəza-xilasetmə əməliyyatları həyata keçirildiyini bildirib. 

Nazirliyin məlumatına görə, “112” qaynar xəttinə daxil olan zənglər əsasında aidiyyəti qurumlar tərəfindən görülən təcili və təxirəsalınmaz tədbirlər nəticəsində yanğınlar operativ söndürülüb, insanların həyatının xilas edilməsi təmin olunub.

Rəsmi statistikaya əsasən, bir həftə ərzində FHN qüvvələri tərəfindən 14-ü azyaşlı olmaqla 37 nəfər xilas edilib, 10-u azyaşlı olmaqla 25 nəfər təhlükəsiz ərazilərə təxliyə olunub. Hadisələr zamanı 2 nəfər xəsarət alıb, 7 nəfər tüstüdən zəhərlənib.

Məlumata görə, qeydə alınan fövqəladə hadisələr nəticəsində ümumilikdə 8 nəfər ölüb.