Azərbaycanda yeddi vəkilə intizam tənbehi verilib

 Azərbaycanda yeddi vəkil barəsində intizam tənbehi tədbirləri tətbiq edilib, daha iki vəkilə isə peşə fəaliyyəti zamanı qanunvericiliyin tələblərinə ciddi riayət etmələri ilə bağlı xəbərdarlıq olunub. Bu barədə Azərbaycan Respublikası Vəkillər Kollegiyası məlumat yayıb.

Kollegiyanın Rəyasət Heyətinin növbəti iclasında qurumun sədri Anar Bağırov Kollegiyanın cari fəaliyyəti, görülən işlər və qarşıda duran vəzifələr barədə hesabatla çıxış edib.

İclasda vəkilliyə qəbulla bağlı məsələlərə də baxılıb. İxtisas imtahanlarının yazılı və şifahi mərhələlərini, eləcə də icbari təlim proqramlarını uğurla başa vuran namizədlər üçün andiçmə mərasimi keçirilib və onlara vəkil vəsiqələri təqdim olunub.

Bundan əlavə, Azərbaycan prezidentinin 25 dekabr 2025-ci il tarixli sərəncamı ilə hakim vəzifəsinə təyin edilən səkkiz Kollegiya üzvünün mükafatlandırılması və vəkillik fəaliyyətinə xitam verilməsi ilə bağlı qərar qəbul edilib.

İclasda, həmçinin bəzi vəkillərin digər vəkil qurumlarına keçməsi və vəkil kabinetlərinin ləğvi ilə bağlı müraciətlər nəzərdən keçirilib və müvafiq qərarlar qəbul olunub.

Rəyasət Heyəti Vəkillərin İntizam Komissiyasının rəylərinə baxaraq, yol verilmiş pozuntulara görə yeddi vəkilə intizam tənbehi tətbiq edib.

N.Təbrizli