Xaçmazda batağan quşlarının kütləvi ölümü qeydə alınıb

Xəzər dənizinin sahilboyu ərazilərində batağan (Podicipedidae) quşlarının kütləvi ölümü müşahidə olunub. Bu barədə Azərtac agentliyi məlumat yayıb.

 Xaçmaz rayonunun Niyazabad kəndi yaxınlığında minlərlə quş cəsədinə rast gəlinib və onlar sahil boyunca kilometrlərlə səpələnib.

Rayon sakinləri bildiriblər ki, quşların kütləvi ölümü fevralın əvvəllərindən başlayıb.

“Quşlar bir yerə toplaşıb hərəkətsiz dururdular, yaxınlaşıb toxunanda belə uçmurdular. Sahildə boyunlarını büküb, soyuqdan ölürdülər”, –  Anar Mikayılov bildirib.

Ekologiya və Təbii Sərvətlər Nazirliyi və Azərbaycan Qida Təhlükəsizliyi Agentliyinin yerli qurumları sahilboyu ərazilərdə cəsədlərin yerində baxışını keçirərək nümunələr götürüb. Quşların kütləvi ölüm səbəbləri daha çox təbii amillərlə, xəstəliklə və ya qida çatışmazlığı ilə əlaqələndirilir, lakin dəqiq nəticə laborator araşdırmalardan sonra müəyyən ediləcək.

Batağanlar əsasən şirin su hövzələrində yaşayan və qış aylarında ölkəmizə köç edən quşlardır. Bundan əvvəl Bakının Şıx çimərliyi sahillərində də ölü batağanlara rast gəlinmişdi.

Cəsədlərin təmizlənməsi və ətraf mühitə mənfi təsirin qarşısının alınması istiqamətində tədbirlər görülür.