Azərbaycan və Türkiyə hərbçiləri kütləvi qırğın silahlarından mühafizə üzrə görüş keçiriblər

Azərbaycanda və Türkiyədə kütləvi qırğın silahlarından mühafizə sahəsində əməkdaşlığın gücləndirilməsi məqsədilə Bakıda görüş keçirilib.Bu barədə Azərbaycan Müdafiə Nazirliyindən məlumat verilib.

Görüşdə bu sahədə qabiliyyətlərin inkişafı və qlobal proseslərin izlənməsi məsələləri müzakirə olunub.

Nazirliyin məlumatına görə, general-leytenant Azər Əliyev iki ölkə arasında qardaşlıq və dostluğa əsaslanan münasibətlərin hərbi sahədə də inkişaf edərək strateji tərəfdaşlıq səviyyəsində möhkəmləndiyini qeyd edib.

Tərəflər radiasiya, kimyəvi və bioloji mühafizə sahəsində fəaliyyətlərin davamlı təhlilinin və hərbi potensialın yüksək səviyyədə saxlanılmasının əhəmiyyətini vurğulayıblar.

Görüşdə həmçinin hərbi və hərbi-texniki əməkdaşlığın cari vəziyyəti nəzərdən keçirilib və qarşılıqlı maraq doğuran digər məsələlər ətrafında fikir mübadiləsi aparılıb.