Fariz Əzizov: Müasir şəhərlər yalnız avtomobillər üçün dizayn edilməməlidir

Bakının şəhərsalma və nəqliyyat sistemi son illər əhəmiyyətli transformasiya mərhələsinə daxil olub. Şəhər Sovet dövründən qalan ənənəvi şəhərsalma modelindən uzaqlaşaraq daha müasir, çevik və insan yönümlü inkişaf istiqamətinə keçid edir.Bunu AAYDA nümayəndəsi Fariz Əzizov Bakı şəhərinin Baş Planına həsr olunmuş tədbirdə çıxışı zamanı deyib.

Onun sözlərinə görə, şəhərdə mobillik sahəsində həyata keçirilən dəyişikliklər müxtəlif istiqamətlərdə yeniliklərə səbəb olub, lakin bu proses müəyyən çətinliklərlə də müşayiət edilir.

“İnsanların şəhərətrafı ərazilərə üz tutması, texnoloji inkişaf və demoqrafik dəyişikliklər gələcək planlaşdırmada nəzərə alınmalı olan vacib amillərdir. Biz gələcəyi öncədən düşünmək və proqnozlaşdırmaq məsuliyyəti daşıyırıq”, – deyə o bildirib.

Fariz Əzizov qeyd edib ki, “Bakı Baş Planı 2040” şəhərin infrastruktur sistemində köklü dəyişikliklərin həyata keçirilməsini nəzərdə tutur və əsas məqsəd insanların gündəlik həyatını daha rahat etməkdir.

Onun sözlərinə görə, Azərbaycan Avtomobil Yolları Dövlət Agentliyinin yanaşması da artıq ənənəvi yol tikintisi anlayışı ilə məhdudlaşmır:

“Biz alternativ nəqliyyat dəhlizləri yaradır, nəqliyyat axınlarını tənzimləyir, həddindən artıq yüklənmiş qovşaqlar üzərindəki təzyiqi azaldır, təhlükəsizlik standartlarını yüksəldir və daha çevik, rəqabətqabiliyyətli mobillik sistemi qurmağa çalışırıq”.

AAYDA nümayəndəsi vurğulayıb ki, müasir şəhərlər yalnız avtomobillərin hərəkəti üçün nəzərdə tutulmamalıdır və şəhər planlaşdırılmasında piyadalar da əsas yer tutmalıdır.

“Şəhərlər insanın dostu olmalıdır. Yollar sadəcə asfalt və sement deyil. Onlar iqtisadi inkişaf, təhlükəsizlik, mobillik və insanların daha keyfiyyətli həyatının vacib hissəsidir”, – deyə o əlavə edib.

Fariz Əzizovun sözlərinə görə, dövlət proqramı çərçivəsində AAYDA hazırda 26 iri yol infrastrukturu layihəsini həyata keçirir və onların bir neçəsi artıq aktiv tikinti mərhələsindədir.

Aytac