Deputat əlavə maliyyə dəstəyi və sığorta mexanizmlərinin gücləndirilməsinə çağırıb

Təbii hadisələr nəticəsində yaranan zərərlərin aradan qaldırılması üçün əlavə maliyyə dəstəyinə ehtiyac var və sığorta sistemi daha effektiv işləməlidir. Bunu deputat Əli Məsimli deyib.

Məsimli bildirib ki, dəymiş ziyanın həcmi nəzərə alındıqda, mövcud tədbirlərlə yanaşı əlavə maliyyə resurslarının ayrılması zəruridir.

“Lakin dəyən ziyanın həcmi nəzərə alındıqda, əlavə maliyyə dəstəyinə ehtiyac olduğu aydın görünür. Eyni zamanda, sığorta sisteminin daha geniş və effektiv şəkildə tətbiq olunması vacibdir. Mən hesab edirəm ki, müxtəlif mexanizmlərlə sığorta sistemi təkmilləşdirilməli və dövlətə hər dəfə əlavə yük düşməsinin qarşısı alınmalıdır. Sığorta mexanizmi tam gücü ilə işləməli və zərər hallarında əsas maliyyə təminatı rolunu oynamalıdır”, – deputat deyib.

Onun sözlərinə görə, yerli qurumların fəaliyyəti ümumilikdə müsbət qiymətləndirilə bilər, lakin bəzi problemlər daha mərkəzləşdirilmiş yanaşma tələb edir.

“Yerli strukturların fəaliyyəti ümumilikdə müsbət qiymətləndirilir. Onlar öz səlahiyyətləri çərçivəsində bir sıra problemlərin həlli istiqamətində işlər görürlər. Lakin intensiv yağışlar zamanı problemlərin təkrar yaranması, məsələn körpülərin uçması kimi hallar göstərir ki, bəzi məsələlər daha mərkəzləşdirilmiş yanaşma tələb edir”, – Məsimli bildirib.

Deputat əlavə edib ki, həm yerli, həm də mərkəzi səviyyədə maliyyə resurslarının artırılması və vəsaitlərin istifadəsində şəffaflığın təmin olunması vacibdir.

Gülnar Nazimqızı