ANAMA: Bir həftədə azad edilmiş ərazilərdə 114 mina və 237 partlamamış sursat zərərsizləşdirilib

Azərbaycanın işğaldan azad edilmiş ərazilərində iyulun 6-dan 12-dək aparılan humanitar minatəmizləmə əməliyyatları zamanı 114 mina və 237 partlamamış hərbi sursat aşkarlanaraq zərərsizləşdirilib.

Bu barədə Azərbaycan Minatəmizləmə Agentliyinin (ANAMA) həftəlik məlumatında bildirilir.

Məlumata görə, aşkar edilən sursatlar arasında 60 tank əleyhinə mina, 54 piyada əleyhinə mina və 237 partlamamış hərbi sursat (PHS) olub. Həmin dövrdə ümumilikdə 1 421,8 hektar ərazi minalardan və partlayıcı qalıqlardan təmizlənib.

Azərbaycan hökuməti işğaldan azad edilmiş ərazilərdə humanitar minatəmizləmə işlərini bərpa və yenidənqurma prosesinin əsas istiqamətlərindən biri hesab edir.

Rəsmi statistikaya əsasən, Azərbaycanda mina qurbanlarının sayı 3 400 nəfəri ötür. Onlardan 359-u uşaq, 38-i isə qadındır.

İkinci Qarabağ müharibəsinin 2020-ci ildə başa çatmasından sonra mina partlayışları nəticəsində 382 nəfər zərər çəkib. Onlardan 55 nəfər həlak olub, zərərçəkənlərin 143-ü mülki şəxslərdir.

Qlobal statistikaya görə isə mina qurbanlarının 84 faizini mülki şəxslər təşkil edir. Mülki qurbanların 37 faizi uşaqlar, ümumi mina qurbanlarının isə 81 faizi kişilər və oğlan uşaqlarıdır.

Gülnar Nazimqızı