39 nömrəli marşrutun hərəkət sxemi və avtobusları dəyişdirilir

İyulun 15-dən Bakının Yeni Yasamal yaşayış massivindəki Məhəmməd Xiyabani küçəsini şəhər mərkəzi ilə birləşdirən 39 nömrəli müntəzəm avtobus marşrutu üzrə sərnişinlərə yeni avtobuslar xidmət göstərəcək.Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Məlumata görə, marşrut xəttinə 12 ədəd iritutumlu, sıxılmış təbii qaz (CNG) texnologiyası ilə işləyən "Iveco" markalı avtobus buraxılacaq. Avtobuslar 4 dəqiqə intervalla hərəkət edəcək.

AYNA-dan  bildirilib ki, marşrutun hərəkət sxemi də dəyişdirilib. İyulun 15-dən etibarən avtobuslar Parlament prospektindən metronun "İçərişəhər" stansiyası istiqamətində hərəkət edəcək, son dayanacaq isə Qoşa Qala qapısının qarşısında yerləşəcək.