Cəbiş müəllimin ailəsi "Rabitəbank"ın reklamına etiraz edir: icazə alınmayıb

Süni intellekt vasitəsilə hazırlanmış reklam çarxında "Bizim Cəbiş müəllim" filminin məşhur obrazından istifadə olunması müəllif hüquqları ilə bağlı müzakirələrə səbəb olub.

"Rabitəbank"ın hazırladığı reklam çarxında Cəbiş müəllim obrazı kredit məhsulunu təqdim edir. Bildirilir ki, reklamın hazırlanması zamanı müəllif hüquqları ilə bağlı məsələlər nəzərə alınmayıb.

Cəbiş müəllim obrazını canlandıran Xalq artisti Süleyman Ələsgərovun qızı Sevil Ələsgərova "Bizim.media"ya açıqlamasında reklamın hazırlanması üçün ailədən hər hansı razılıq alınmadığını bildirib.

"Atamın yaratdığı Cəbiş müəllim obrazı illərdir insanların yaddaşında yaşayır. Belə bir obrazın kommersiya məqsədilə reklama çevrilməsi məni məyus etdi. Bu, təkcə müəllif hüquqları məsələsi deyil, həm də sənətkara və onun yaratdığı irsə münasibətdir", - o qeyd edib.

Onun sözlərinə görə, bu cür hallarda müəlliflərin və ya onların hüquqi varislərinin razılığı alınmalı, milli-mədəni irsə daha həssas yanaşılmalıdır.

"Bizim Cəbiş müəllim" 1969-cu ildə çəkilmiş və Azərbaycan kinosunun klassik nümunələrindən biri hesab olunur. Müharibə-dram janrında ekranlaşdırılan filmin rejissoru Həsən Seyidbəyli, ssenari müəllifi isə Maqsud İbrahimbəyovdur. Filmdə Cəbiş müəllim obrazı Xalq artisti Süleyman Ələsgərov tərəfindən canlandırılıb və Azərbaycan kino tarixinin ən yaddaqalan obrazlarından biri kimi tanınır.

Müəllif hüquqları ilə bağlı qanunvericiliyə əsasən, müəllif əsərlərindən və onların elementlərindən, o cümlədən tanınmış obrazlardan kommersiya məqsədilə istifadə hallarında hüquq sahibinin və ya onun hüquqi varislərinin razılığı tələb oluna bilər. Bu məsələ ilə bağlı "Rabitəbank"ın mövqeyi hələlik açıqlanmayıb.

Gülnar Nazimqızı