DİN-dən tələbələrə xəbərdarlıq: kirayə mənzil elanları ilə bağlı dələduzluğa diqqət

Yeni tədris ilinin başlaması ərəfəsində kirayə mənzil axtaran tələbələrin sayının artmasından istifadə edən dələduzlar saxta elanlarla vətəndaşlardan əvvəlcədən beh almağa çalışırlar.

Daxili İşlər Nazirliyindən bildirilib ki, dələduzlar müxtəlif elan platformalarında münasib qiymətə kirayə mənzil təklifləri yerləşdirir, daha sonra isə mənzili “saxlamaq” adı ilə əvvəlcədən ödəniş tələb edirlər.

Vətəndaş pul göndərdikdən sonra isə elan sahibi ilə əlaqə yaratmaq mümkün olmur, telefon zənglərinə və mesajlara cavab verilmir.

DİN vətəndaşlara, xüsusilə tələbələrə mənzili görmədən, elan sahibinin kimliyini və mənzilə dair məlumatları dəqiqləşdirmədən heç bir halda əvvəlcədən pul göndərməməyi tövsiyə edib.

Nazirlik bazar qiymətindən xeyli aşağı təklif olunan mənzillərlə bağlı diqqətli olmağa, həmçinin “təcili beh göndərin”, “başqa müştəri gözləyir” kimi ifadələrlə vətəndaşı tələsdirən şəxslərə inanmamağa çağırıb.

Belə hallarla qarşılaşan şəxslərin dərhal polisə məlumat vermələri tövsiyə olunub.