Ekspres avtobuslarla bir gündə 127 mindən çox sərnişin daşınıb

Ekspres avtobuslarla sentyabrın 16-da 127 mindən çox sərnişin daşınıb.Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Bildirilib ki, sərnişindaşımanın fasiləsiz təşkili istiqamətində tədbirlər davam etdirilir. Böyük sərnişin axınına baxmayaraq, ekspres avtobuslar fəaliyyətini davam etdirir.

Məlumata görə, metro xətlərinin ayrılması layihəsi çərçivəsində təşkil edilən ekspres avtobuslardan sentyabrın 16-da 127 mindən çox sərnişin istifadə edib. Həmin gün “28 May” Nəqliyyat Mübadilə Mərkəzindən isə 200 mindən çox sərnişin keçib.

AYNA qeyd edib ki, Daxili İşlər Nazirliyinin əməkdaşları ilə birgə nəqliyyat mübadilə mərkəzlərinin nizamlı fəaliyyəti təmin olunur.

Agentlik sərnişinlərə avtobus gözləyərkən avtomobil yolunda deyil, səkidə dayanmaları və avtobuslara minərkən növbə qaydasına riayət etmələri ilə bağlı müraciət edib.