“PAŞA Bank” rəsmisi: Liderliyin əsasını ünsiyyət və təşkilat mədəniyyəti təşkil edir

Liderin əsas vəzifəsi yalnız funksional öhdəlikləri yerinə yetirmək deyil, düzgün ünsiyyət qurmaq və təşkilatın mədəniyyətini formalaşdırmaqdır.

Bunu “PAŞA Bank” ASC-nin Baş Təhlükəsizlik direktoru Vasif Qasımov ADA Universitetində Liderlik və İnnovasiya üzrə IE Mərkəzinin “AZEMBA” proqramının açılışında deyib.

O bildirib ki, MBA təhsili ona müxtəlif funksional istiqamətlərin vahid təşkilati məqsəd ətrafında birləşməsinin əhəmiyyətini anlamağa kömək edib.

“Hamımız vahid bir təşkilatın hissəsiyik və ümumi məqsədlərimiz var. Müştərini pərdəarxasında kimin durması maraqlandırmır”, - deyə V.Qasımov bildirib.

Onun sözlərinə görə, liderlik funksional vəzifələrdən daha geniş anlayışdır və əsasən ünsiyyət və təşkilat mədəniyyəti ilə bağlıdır.

Qasımov bildirib ki, ünsiyyət düzgün mesajın doğru insanlara və doğru zamanda çatdırılmasını, mədəniyyət isə təşkilatın əsas dəyərlərinin qorunmasını nəzərdə tutur.

O, liderliyin yalnız tutulan vəzifə ilə deyil, təcrübə və həmin təcrübənin praktikada tətbiqi ilə formalaşdığını vurğulayıb.

Aytac