Milli Məclisin komissiyası Türkiyədə Azərbaycan əleyhinə informasiya kampaniyası barədə açıqlama yayıb

Milli Məclisin Xarici müdaxilələrə və hibrid təhdidlərə qarşı müvəqqəti komissiyası Türkiyədə sosial media platformaları vasitəsilə Azərbaycan əleyhinə aparıldığı bildirilən informasiya kampaniyasını araşdırıb.Bu barədə komissiyanın açıqlamasında bildirilib.

Açıqlamaya görə, komissiyanın monitorinqi nəticəsində kampaniyanın Azərbaycan-Türkiyə münasibətlərini hədəf aldığı, ictimai rəyi çaşdırmağa, dövlətə və dövlət institutlarına qarşı inamsızlıq yaratmağa, həmçinin cəmiyyətdə qütbləşməni dərinləşdirməyə yönəldiyi müəyyən edilib.

Komissiyanın məlumatına əsasən, kampaniya əlaqələndirilmiş şəkildə hədəfli reklamlar, real və saxta sosial media hesabları vasitəsilə aparılır.

Komissiya kampaniyada iştirak edən şəxslərlə bağlı məlumatların Azərbaycanın aidiyyəti dövlət qurumlarına təqdim ediləcəyini bildirib.

Açıqlamada həmçinin Türkiyə qanunvericiliyinə əsasən bu cür fəaliyyətlərin hüquqi məsuliyyət yarada biləcəyi qeyd olunub.

Komissiya Azərbaycan və Türkiyə vətəndaşlarını sosial mediada yayılan məlumatlara diqqətlə yanaşmağa və saxta məlumatlara inanmamağa çağırıb.