Ağstafada iki müəllim dərs bölgüsü üstündə dava edib - birinin vəziyyəti kafidir

Ağstafa şəhərində Əmirxan Hüseynov adına 1 nömrəli tam orta məktəbdə müəllimlər arasında mübahisə zamanı bir müəllim xəsarət alıb.

APA-nın yerli bürosunun məlumatına görə, 1981-ci il təvəllüdlü ibtidai sinif müəllimi P. Məmmədova qolunun əzilməsi və cırılmış yara diaqnozu ilə Ağstafa Rayon Mərkəzi Xəstəxanasına yerləşdirilib.

Ona tibbi yardım göstərilib və vəziyyətinin kafi olduğu bildirilir.

Məlumata görə, hadisə dərs bölgüsü ilə bağlı yaranan mübahisə zamanı baş verib. P. Məmmədova müəllim yoldaşı S. Əhmədovanın ona xəsarət yetirdiyini bildirib.

Daxili İşlər Nazirliyinin Mətbuat Xidmətinin regional qrupundan APA-ya bildirilib ki, müraciətlərlə bağlı Ağstafa Rayon Polis Şöbəsində müvafiq ekspertiza təyin edilməklə araşdırma aparılır.