FHN: Yaxın günlərdə intensiv yağış, sel və güclü külək gözlənilir

Azərbaycanda yaxın günlərdə qeyri-sabit hava şəraiti, intensiv yağış, bəzi ərazilərdə lokal subasma, dağ çaylarında qısamüddətli sel və daşqın gözlənilir.

Bu barədə Fövqəladə Hallar Nazirliyi (FHN) Milli Hidrometeorologiya Xidmətinin məlumatlarına əsasən əhaliyə müraciətində bildirib.

Məlumata görə, qeyri-sabit hava şəraiti, o cümlədən intensiv yağış bu gündən başlayaraq yaxın günlərdə ölkə ərazisində, həmçinin Bakıda və Abşeron yarımadasında müşahidə olunacaq. Ayrı-ayrı ərazilərdə şimşək çaxacağı və arabir güclü külək əsəcəyi proqnozlaşdırılır.

FHN əhaliyə sel, daşqın və subasma təhlükəsi olan ərazilərdən uzaq durmağı, təhlükə yaranacağı halda yaxınlıqdakı yüksəkliyə qalxmağı və xilasedicilərin göstərişlərinə əməl etməyi tövsiyə edib.

Nazirlik ildırım zamanı elektrik cihazlarının şəbəkədən ayrılmasını, açıq ərazidə elektrik xətləri, ildırımötürücülər, navalçalar və antenalardan uzaq durmağı, hündür ağacların altında dayanmamağı tövsiyə edib.

Güclü külək zamanı isə yüngül konstruksiyalardan, müvəqqəti tikililərdən, bina və reklam lövhələrindən, elektrik dirəkləri və naqillərdən uzaq durmaq çağırışı edilib.

FHN həmçinin kiçikhəcmli gəmi istifadəçilərinə belə hava şəraitində dənizə çıxmağın qadağan olduğunu xatırladıb.

Nazirlik təhlükə zamanı 112 qaynar xəttinə müraciət etməyə çağırıb.