Qızılcaya görə ştatda fövqəlada vəziyyət elan olunub

ABŞ-ın Nyu-York ştatında bu il 108 qızılca hadisəsinin qeydə alınmasından sonra qubernator Keti Hokli ştat üzrə fəlakət xarakterli fövqəladə vəziyyət elan edib. Bu barədə Reuters yazıb. 

Hadisələrin 92-si iyulun 15-dən etibarən ştatın 18 qraflığında, xüsusilə peyvəndlənmə səviyyəsinin aşağı olduğu kənd icmalarında qeydə alınıb. Ümumilikdə 108 hadisədən 101-i Nyu-York şəhərindən kənarda, 7-si isə şəhərdə aşkarlanıb.

Fövqəladə vəziyyət çərçivəsində qızılca, parotit və məxmərəkə qarşı (MMR) peyvəndlərin tətbiqinə icazə verilən tibb işçilərinin dairəsi genişləndirilib. Həmçinin tibb bacılarına qızılca şübhəsi olan şəxslər üçün test təyin etmək səlahiyyəti verilib.

Sərəncama əsasən, bütün MMR peyvəndləri barədə məlumatlar 72 saat ərzində Nyu-York ştatının və ya Nyu-York şəhərinin immunizasiya reyestrinə daxil edilməlidir.

Gülnar Nazimqızı