Rusiya Türkiyədən pomidor asılılığını azaldır

Rusiya Türkiyədən mal idxalı ilə bağlı embarqonu aradan qaldırsa da, bu, pomidora aid edilməyib.

 

"Report" türk mətbuatına istinadən xəbər verir ki, buna səbəb Rusiyanın son 2 ildə 500 hektar ərazidə 600 mln. ABŞ dolları investisya qoymaqla istixanalar yaratmasıdır.

 

Rusiya yaxın illərdə istixanaların sahəsini 1 500 hektara çatdırmağı planlaşdırır. Bununla da, rəsmi Moskva Ankara ilə münasibətlərdə yaranmış soyuqluqdan istifadə edərək kənd təsərrüfatı istehsalını stimullaşdırır və Türkiyədən pomidor asılılığını azaldır. 

Rusiyadakı soyuq hava şəraiti nəzərə alınarsa, 1 hektar istixanadan məhsul toplamaq üçün 2 MVt. elektrik enerjisi sərf etmək lazımdır. Daşınma ilə bağlı problemlər də nəzərə alınarsa, Rusiya pomodorunun 1 kiloqramı Türkiyə pomidoru ilə müqayisədə 3 dəfə baha - 63 rubla (təxminən 2 manata) başa gəlir. 

Qeyd edək ki, Rusiya istixanalarında yetişdirilən məhsulların 60%-i xiyar, 20%-i pomidor, 20%-i isə digər tərəvəzlərdir. Rusiya hökumətinin Türkiyəyə pomidor embarqosunun istixana biznesinə müsbət, inflyasiyaya isə mənfi təsir edəcəyi gözlənilir.