İşıq və qazın qiyməti bahalaşacaq?

Xəbər verdiyimiz kimi, ötən gün axşam saatlarında Tarif Şurası ictimai nəqliyyatda gediş haqqının avqustun 1-dən 50 faiz artırıldığına dair qərarını açıqlayıb. Növbəti mərhələdə kommunal xidmətlərin qiymətində bahalaşma olacaqmı?

Bununla bağlı BiG.AZ-a açıqlama verən Liberal İqtisadçılar Mərkəzinin rəhbəri Akif Nəsirli bildirib ki, Azərbaycanda qiymətlər Tarif Şurası tərəfindən tənzimlənir: 

"Bu qiymətlər dövlət tərəfindən müəyyən edilir. Bahalaşmanın nə vaxt olacağını proqnozlaşdırmaq mümkün deyil. Çünki dünən qiymətlər başqa idi, sabahdan isə fərqli olacaq. Dövlətin bu günə kimi addımlarını nəzərə alaraq proqnoz vermək olar ki, gediş haqqı bahalaşmazdan əvvəl enerji daşıyıcıları bahalaşır. Ötən illər ərzində həm enerji daşıyıcılarının, həm yanacağın qiyməti xeyli bahalaşdı. Gediş haqları uzun müddət sabit qaldı. Qarşıdakı il ərzində yanacağın və kommunal xidmətlərin qiyməti sabit qalacaq. Növbəti ildən yavaş-yavaş enerji daşıyıcıların və yanacağın da qiymətində bahalaşma olacaq. Hesab edirəm ki, yanvar ayından artıq kommunal xidmətlərinin qiymətində artım olacaq".