Azərbaycanın sənaye zonalarında istehsal artıb

2022-ci ilin yanvar-martında  Azərbaycanın sənaye zonalarında istehsal olunmuş məhsulların həcmi 681 milyon manat təşkil edib ki, bu da 2021-ci ilin eyni dövrü ilə müqayisədə  82,6% çoxdur. 

Agentlik qeyd edir ki, ümumi satışdan 318 milyon manat (+2,7 dəfə) ixracın payına düşüb.

Hesabat dövründə iqtisadiyyatın qeyri-neft sektorunun istehsalının ümumi həcmində Azərbaycanın sənaye zonalarında istehsal olunmuş məhsulların xüsusi çəkisi 14,8 faiz, ixracda isə 36,3 faiz təşkil edib.

"Bu gün sənaye zonalarında 101 sahibkarlıq subyekti rezident statusu alıb, onlardan 58-i fəaliyyətə başlayıb. Rezidentlərin investisiyaları 6,4 milyard manatı (indiki məzənnə ilə 3 milyard 764 milyon dollar) ötüb. Ümumilikdə sənaye zonaları və sənaye məhəllələrindəki müəssisələr tərəfindən 6,5 milyard manatlıq məhsul istehsal edilmiş, ondan 2,1 milyard manatlıq məhsul ixrac edilmişdir. Məhsullar 40 ölkəyə ixrac edilib”, - deyə agentlik vurğulayır.

Azərbaycanda 5 sənaye parkı (Sumqayıt Kimya Sənaye Parkı, Mingəçevir, Qaradağ, Pirallahı və Balaxanı) və 4 sənaye məhəlləsi (Neftçala, Masallı, Hacıqabul, Sabirabad) var.