2023-cü il dövlət büdcəsinin parametrlərinə yenidən baxılıb

İclasda ölkənin maliyyə naziri Samir Şərifov hesabat məruzəsi ilə çıxış edib.

Azərbaycan prezidenti İlham Əliyev bu həftə bildirib ki, əlavə gəlirlərin olması ilə əlaqədar hökumətə 2023-cü il dövlət büdcəsinin parametrlərinə yenidən baxmaq tapşırıb. Eyni zamanda, onun sözlərinə görə, yenidən baxılması nəticəsində dövlət büdcəsinin xərcləri ən azı 3 milyard manat artacaq.

Maliyyə Nazirliyinin son məlumatına görə, birinci rübdə Azərbaycanın dövlət büdcəsinin gəlirləri 8 milyard 290 milyon manat (2022-ci ilin yanvar-martı ilə müqayisədə 18,3 faiz artım) olub. Eyni zamanda, mədaxil planı 104,8 faiz yerinə yetirilib. 

Birinci rübdə dövlət büdcəsinin xərcləri 6 milyard 566,9 milyon manat (artım 16,7 faiz) olub, proqnoza 111,6 faiz əməl edilib.

Nəticədə 2023-cü ilin yanvar-martında dövlət büdcəsinin profisiti 1 milyard 723,1 milyon manat və ya hesabat dövründə ÜDM-in 5,68 faizini təşkil edib.

2023-cü il dövlət büdcəsinin gəlirləri üzrə proqnoz 30 milyard 773,978 milyon manat, xərcləri isə 33 milyard 353,278 milyon manat təşkil edir. 2023-cü il dövlət büdcəsinin kəsiri 2 milyard 579,3 milyon manat və ya ÜDM-in 2,4 faizi səviyyəsində proqnozlaşdırılır.