Mərkəzi Bank interaktiv statistik naviqator işə salıb

Azərbaycan Mərkəzi Bankı ictimaiyyətin, media nümayəndələrinin və tədqiqatçılarının statistik məlumatlara çıxış imkanlarını genişləndirmək məqsədilə interaktiv naviqator sistemini istifadəyə verib. Yeni sistem “Statistik Naviqator” adlanır və müxtəlif sahələr üzrə dinamik, əraziyə əsaslanan maliyyə göstəricilərini vizual formada təqdim edir.

Təqdimat zamanı çıxış edən Mərkəzi Bankın nümayəndəsi bildirib ki, qurum mütəmadi olaraq makroiqtisadi, monetar, bank, sığorta və real sektor üzrə statistik bilgilər paylaşır və bu məlumatlar artıq daha interaktiv və istifadəyə yararlı şəkildə təqdim olunacaq.

“Əgər əvvəllər bu məlumatlar yalnız bülleten formasında çap olunurdusa, indi biz onu daha dinamik və interaktiv hala gətirmişik. İstifadəçilər hər bir bölgə üzrə – Bakı, Aran, Şirvan, Naxçıvan və işğaldan azad olunmuş ərazilər daxil olmaqla – xəritə üzərindən klikləyərək həmin regiona aid maliyyə göstəricilərini əldə edə biləcəklər”, –  qurum rəsmisi vurğulayıb.

Sistem vasitəsilə tədqiqatçılar, media nümayəndələri və beynəlxalq qurumlar istədikləri region və sahə üzrə statistik göstəriciləri seçərək analiz edə biləcək, bu isə analitik hesabatların hazırlanmasını asanlaşdıracaq.

“Bu, sadəcə yeni texniki alət deyil, həm də şəffaflığın artırılması və qərar qəbul edənlər üçün məlumat bazasının gücləndirilməsi məqsədi daşıyır”, –  əlavə olunub.

Platforma vaxtaşırı yenilənəcək və gələcəkdə daha çox indikatorlar, həmçinin digər dövlət orqanlarının məlumatları ilə inteqrasiya da nəzərdə tutulub.

N.Təbrizli