Paşa Bankın kredit portfeli 18% artıb, aktivlər azalıb

2024-cü ilin sonuna Paşa Bankın kredit portfeli 4 milyard manata çatıb və portfelin əsas hissəsi biznes kreditlərindən ibarətdir. Bankın açıqlamasına görə, biznes kreditlərində 18%-lik artım qeydə alınıb. Bu barədə bankın İdarə heyətinin sədri Cavid Quliyev məlumat verib. 

Bankın xalis mənfəəti azalsa da, faiz gəlirləri 5%-dən çox artım göstərib. Dövriyyə ötən illə müqayisədə 16% artaraq 114 milyard manata çatıb.

İki əsas istiqamətdə artım

Kredit portfelində əsas artım sahələri karbonhidrogen bankçılığı və kiçik və orta sahibkarlıq (KOB) olub. 

Karbonhidrogen sahəsində 17%-lik artım, KOB sektorunda isə 14%-ə yaxın yüksəliş qeydə alınıb. 

Bank bu artımı “Rəqəmsal Maliyyə Platforması” vasitəsilə təqdim olunan faktoring və digər kredit məhsulları ilə əlaqələndirir. 

Faktoring kreditləri 60%-dən çox artım göstərərək 2024-cü ilin əsas məhsullarından birinə çevrilib.

Yeni müştəri modelləri və texnologiya yönümlü yanaşma
Bankın strategiyasına müştəri yönümlü transformasiya da daxildir. 

“Remote RM” (uzaqdan satış meneceri) modeli və yeni “Customer Relations Management” (CRM) platforması müştərilərlə daha effektiv əlaqə qurmağa imkan verir. Yeni CRM sistemi daxili resurslarla hazırlanıb və xidmət keyfiyyətini artırmaq məqsədi daşıyır.

Korporativ və sindikat kreditləri genişlənir
Korporativ bankçılıqda sindikatlaşdırılmış kreditlərin rolu da artıb. 

2024-cü ilin sonunda Paşa Bank iki sindikatlaşdırılmış kreditlə bazara çıxıb və bu maliyyələşdirmə alətlərinə yerli bank sektorundan və inkişaf şirkətlərindən ciddi maraq göstərilib. Eyni zamanda bank karbon emissiyasına əsaslanan istiqrazlar da daxil olmaqla alternativ maliyyələşdirmə mexanizmlərini genişləndirməyi planlaşdırır.

N.Təbrizli