Pakistanda KOB-lar ÜDM-in 40%-ni təşkil edir

Pakistanda ümumi daxili məhsulun (ÜDM) təxminən 40%-i KOB-ların payına düşür. Bunu Bakıda Halal Biznes Forumunda çıxışı zamanı Pakistanın Kiçik və Orta Müəssisələrin İnkişafı İdarəsinin (SMEDA) baş icraçı direktoru Socrat Aman Rana bildirib.

“Pakistanda ümumi daxili məhsulun (ÜDM) təxminən 40%-i KOB-ların payına düşür. Biz İƏT KOB şəbəkəsinin gücləndirilməsinə və beynəlxalq əməkdaşlıqların qurulmasına tam dəstək verməyə hazırıq,” –  o, Halal Biznes Forumu çərçivəsində bildirib.

Rana vurğulayıb ki, İƏT ölkələrində kiçik və orta sahibkarlığın inkişafı bir sıra boşluqların doldurulmasına və halal iqtisadiyyat çərçivəsində daha effektiv yerləşdirilməsinə imkan yaradır.

“Halal bazarında KOB-ların mövqeyini gücləndirmək bu sektorun davamlı inkişafı üçün vacibdir. Pakistan bu sahədə öz təcrübəsini paylaşmağa və ortaq təşəbbüslərdə yer almağa hazırdır,” –  o əlavə edib.

SMEDA rəhbəri Azərbaycanın İƏT ölkələri arasında regional iqtisadi əməkdaşlığın təşviqindəki rolunu yüksək qiymətləndirərək, forumun təşkilinə görə təşəkkürünü bildirib.

“Regional səviyyədə əməkdaşlığın qurulması istiqamətində göstərilən təşəbbüslərə görə Azərbaycana minnətdarıq. Bu cür tədbirlər birgə iqtisadi inkişaf üçün önəmli zəmin yaradır,” –  Rana qeyd edib.

Gülnar Nazimqızı